ـ1ـ
هْجَرْت بْلادِي بْسَاعِة قَهْرْ
وْبَعْدَا لِلْيَوْم دْمُوعِي
بْتِشْهَدْ عَ إِنُّو رْجُوعِي
كانْ لَوْلا هَاك الطُّوفَانْ
الْمِتْلَطَّى بْحِقْد الإِنْسَانْ
شَخْتُورَه بِعْبَاب الْبَحْرْ
ـ2ـ
لُبنان الْـ دِبْت بْحُبُّو
وْغِرْت عْلَيْه مْنِ النَّسْمِه
احْتَرَقْ عَ أْيَادِي شَعْبُو
احْتَرَقْ.. شُو نَفْع الْكِلْمِه؟!
وْهَـ الشَّبَابْ اللِّي تْرَبُّوا
تَا حَتَّى يْقُودُوا الأُمِّه
خَانُوا الوطَنْ وِتْخَبُّوا
خَلْف الدِّين الْـ مُشْ مَحْبُوبْ
إِلاَّ ما يْوَحِّد قْلُوبْ
وْصَارُوا يِحْكُوا بِالْقِسْمِه
وْيِرْمُوا بَيْن النّاس حْدُودْ..
يِعْنِي صهرنا مَحْمُودْ
الْـ مِنْعِدُّو أَغْلَى حَبِيبْ
لازِم يْطَلِّقْ وِيْسِيبْ
مِرْيَانَا.. بِنتْ عَمِّي!
ـ3ـ
وْإِبْنُنْ وَحِيدُنْ عِصَامْ
يَللِّي نِصُّو نِصْرَانِي
وْنِصُّو تَابِعْ لِلإِسْلامْ
شُو بَدكُنْ.. عَ الْعِمْيَانِي
قِسْمِةْ عَدلْ نِقِسْمُو
تَا حَتَّى نِرْضِي بَيُّو
أَوْ تَا مَا نْزَعِّلْ إِمُّو؟!
ـ4ـ
وْنِحْنَا اللِّي هْجَرْنَا مْنِ سْنِينْ
وْبِقْلُوبْنَا بَعْدُو الْحَنِينْ
عَمْ يِكْوِينَا لَيْل نْهَارْ
مُشْ رَحْ نِمْضِي عَ قَرَارْ
يْلَطِّخْ إِيدَيْنَا بِالْعَارْ
وْيِحْرُقْ دِينْ الْمُغْتِرْبِينْ!
**
